EMNIEM

موضوع: EMNIEM الثلاثاء أغسطس 10, 2010 2:59 pm

القصـــة الكاملـــة

--------------------------------------------------------------------------------

1 - مقدمــة :

في منتصف التمانينات بدات مجموعة جديده من الــ " rapers " تظهر في الساحه ، الجديد فوقتها انو المجموعة هادي ما كانو يبغو ينعرفو على انهم " رابرز " لكن كانو يفضلو مسمى " hip-hop artists"

كانت موسيقاهم ضعيفة وكلماتهم تافهه وسطحيه ، وما قدرو ياخدو اهتمام شريحة كبيرة من الجماهير ، غييرو كتير في طريقة غناء الراب على هواهم لدرجه انو سار في خلط بين اغانيهم وهل هيا فعلا " هيب هوب " او " pop " .

كان هادا شي ضار بالنسبة لموسيقى الهيب هوب ، ومع وجود مجموعة من الرابرز الاقوياء في الساحه الا انو مشكلتهم كانت فانهم ما قدرو يجلبو اهتمام شريحة كبيرة من الناس ، بمعنى انو نفس محبي الراب القدام استمرو معاهم بس ما قدرو يجذبو ناس جداد ويخليهم يهتمو بالفن دا . فــ فضلت مبيعاتهم ضعيفة وفضلت موسيقى الراب تحتل مكان سيء بين باقي انواع الموسيقى . واللي كان بيضيع الراب اكتر هوا قوة انتشار مجموعه " الهيب هوب ارتستس " اللي اتكلمنا عنهم واللي بدانو ينتشرو وانتشر معاهم فنهم اللي نقدر نقول عنو " hip-pop".

ومع دا الشي بدات الاسئلة تجول فخاطر كل " الرابرز " الحقيقين وكل محبي الراب حولين العالم

ايش حتكون النهاية ؟ ، ولفين حيوصل الراب وهل حتكون هادي هيا نهايتو ولا حيرجع الراب للساحه مرة تانية ؟

بداية عودة الراب كانت بطيئة وهادية بدون اثارة ضجة

بدات مع اندية الــ " Free Style " اللي كانو بيتنافسو فيها الرابرز الجدد ، وكانت تتسجلهم اشرطة وتتوزع بين الجماهير بدون ما يكون فيه تدخل من شركات انتاج كبيرة . بس توزيع الاشرطة بين الجماهير وجودة المغنيين الجدد اللي بداو يظهرو كانت كافية انها تشد كتير من الناس لفن الراب مرة تانية وتخلي الوسط مستعد انو يتقبل " رابر" جيد في حالة وجوده .

وفنفس الوقت كان ابطال اندية الفري ستايل فكل مكان وعندهم مواهب قوية في الراب وكانو بينتظرو اقل فرصة يبداو منها حياة الشهرة والفلوس .

هادا كان وضع الراب في الفترة اللي كان امينم فيها في بداية حياتو

--------------------------------------------------------------------------------

2 - الطفولـــة :

في كانسس سيتي ،في سنه 1973 " ديبي نيلسون " بنت عمرها 15 سنة حبت شخص اسمه " مارشل ماذر جونيور " ، وهما الاتنين كانو اعضاء ففرقة غنائية شعبية .

وبمجرد ما وصلت " ديبي " للسن اللي يسمحلها اعلنت زواجها من " مارشل "

وفي يوم 17 اكتوبر 1975 ، ديبي ولدت اول اولادها من " مارشل " ، واتفقو انهم يسمو ولدهم "مارشل بروس ماذرز التالت " .

زواجهم ما كان سعيد بالدرجه الكافية اللي تخلي " مارشل ماذرز جونيور " يبقى ، فــ بعد سته شهور من ولادة " مارشل التالت" ابوه هجرو هوا وامو للابد .

ومع كل المشاكل ام مارشل سارت عندها عقد اضرابات نفسية ، وكان واضح للكل انها ما حتكون ام طيبة لابنها

وفي نشأة مارشل ومع كل المشاكل اللي بتحصلو بسبب امو ، كان الشخص الوحيد اللي قدر يحبه بجد هو اخو امه الصغير ، خاله " روني "

ولما صار عمر مارشل خمسة سنين قررت امه انها تنقل من (ميتزوري) ، الى شرق ولاية ( ديترويت ) في العاصمة ( ميتشجن)

مارشل سار حزين بشكل دائم بسبب بعده عن خاله واقرب اصدقائه " روني "

ام مارشل استغربت من التغيير اللي صابه وكانت حزينة على ولدها ، فكان الحل فبالها انها تخليه يطلع يلعب مع اولاد الحي اللي هما ساكنين فيه ، وما كانت عارفة انو ابنها بيلاقي كل انواع الاهانة في الشارع من اولاد الحي لانو كان اصغرهم في السن والحجم، بالاضافة لانو كان الابيض الوحيد فيهم .

وزي ما بيسوو فيه اهل الحي ، طلاب مدرسته برضو ما كانو بيقصرو ، مارشل كان بيتعرض للاهانة بشكل مستمر يوم بعد يوم في كل بريك بين الحصص ، وكل فسحه غدا .

ولما كان مارشل في الصف الرابع كان في طالب اكبر منه اتعمد انه يهين مارشل فكل مكان وفكل وقت ، لدرجه انه فيوم من الايام ضرب مارشل وسببله نزيف في الدماغ ، دخل بسببه المستشفى وقعد فيها 10 ايام في غيبوبه ، والدكاترة كانو بيقولو لامه انو يمكن ما يصحى منها .

بعد الحادثة هادي بشوية قررت ام مارشل انهم حيرجو ل( كانسس سيتي ) مرة تانية .

وبرجوعهم رجعت علاقة مارشل بخاله روني لعهدها السابق من القرب.

وباعتبار روني الكبير فعلاقة زي هادي ، من الطبيعي انو مارشل يقلد روني ويحب كل شي يحبه . وكان من اكتر الاشياء اللي روني يهتم بيها هيا " موسيقى الراب " ، وكتابة الكلمات

بعدها وفـ 1978 قررت " ديبي " انها ترجع لديترويت مرة تانية ، وانتهت تلاته سنين رائعه فحياة مارشل بقرب خاله روني .

--------------------------------------------------------------------------------

3 - EMINEM

برجوع مارشل لديترويت ما قل اهتامه بالراب بالعكس ازداد.، كان مارشال ما يتجرا يكتب راب قدام روني لانو كان يحس انو كلامو حيطلع سخيف مقارنة بكلام خاله روني اللي كان مارشل يشوفه اكتر من رائع ، بس بوجود مارشل بعيد عن روني بدات تجيه جرأة الكتابة ، وفعمر 13 سنة ، بدا بالفعل كتابة اول كلماته، وكان اتعلم من روني كيف يصنع الحان خفيفه فشي اسمه " beat box" ، فبدا مارشل يكتب كلمات ويالف الحان عليها ويصنع اغاني خاصة بيه

ومع مرور الوقت بدات تتطور مواهب مارشل في الكتابة ، واختار لنفسه الاسم اللي هوا معروف بيه حاليا " eminem"

اسم امينم ماخود من اسم مارشل الحقيقي " مارشل ماذرز " ، حرفين الام في بداية كل كلمة دمجهم فكلمة وحده.

وفي المدرسة الثنوية

بدا امينم يالف مقطوعات راب صغيرة بنفس الـ " بيت بوكس " وينشرها بين اصحابو ، وفي الفترة هادي كانت متشرة حاجة اسمها " منافسة الكتابة " " rhyming competition" ، وهيا عبارة عن اتنين رابرز يوقفو قدام بعض ويقولو كلمات بالدور الين ما واحد فيهم يخلص كلامو او يحس بالاهانة وما يقدر يكمل

ذاعت شهرة امينم بين الطلاب مع الوقت وسار بيكسب كل منافسة يدخل فيها لدرجة سارو الطلاب يتخوفو من تحديه لانو نتيجة تحدي امينم كانت معروفة " الخسارة "

في الفترة هادي بدا " امينم " يفكر في الراب على انه ممكن يكون مستقبل حياته.

--------------------------------------------------------------------------------

4 - حياة الراب

وفي المدرسة الثنوية برضو اتعرف امينم على البنت اللي حتكون حب حياتو وزوجتو في المستقبل " kimberly scott"

وفي الفترة هادي برضو اسس امينم اول فرقة راب انضم ليها وكان مقرها " بدروم" فواحد من بيوت ديترويت كانو يعزفو فيه على الات بدائية.

وبعد تاسيس الفرقة بدا امينم يتغيب عن المدرسة بشكل مستمر ، كان فباله انو الوقت اللي بيقضيه في كتابة الكلمات او في اي شيء يخص الراب احسن من الوقت اللي يقضيه في المدرسة

فكرتو كانت انه حيكون فيوم من الايام رابر مشهور ، ايش الفايدة من دراستو للكيميا ولا الرياضيات والمعادلات المعقدة

وفي عمر 17 سنة ، ترك امينم الدراسة تماما ، وبدا يسوي اشرطة لنفسه ويرسلها لمحطات الراديو

الين ما اعجبت فيه محطة راديو محلية فمدينته ، وبدات تذيع اغانيه بشكل مستمر

وكان انطباعهم عنو انو " مرررة ممتار ، بالنسبة لشخص ابيض "

وكان المدح اللي بيتلقاه منو بيشحنو عشان يحقق حلمو

فسنة 1992 جا روني يعيش مع امينم في ديترويت مرة تانية

وبدات العلاقة ترجع بيناتهم زي ما كانت ، ومع الوقت بدا امينم يكلم روني عن احلامه ، لاكن ردت فعل روني ما كانت مشجعه ابدا ، كان يقله انو من الافضل ينسا كل شي عن الراب لانه عمرو ما رح ينجح

بس الشي دا ما اثر فيه ومع كده كمل بارسال اشرطته لشركات الانتاج ومحطات الراديو.

جاته الفرصة اخيرا لما عرضو عليه انو يغني مباشر فأكبر مسرح تتغنى فيه اغاني الراب فديترويت ، سنه 1992

لاكن المفاجاة كانت انو الجمهور ما اتقبل امينم تماما ، كل اللي سمعو داكا اليوم كان " بوووو " من الجماهير اللي ما اتقبلت فكرة " رابر " ابيض

لاكن الشي دا ما زاد امينم الا عزيمة

وبمجرد ما انتها العرض وانتهت اغنيته طلب من المسؤول عن المسرح انو يرجع يغني تاني ، وكان الرد بالموافقة

فسار امينم يتردد باستمرار عالمسرح ، ومع الوقت بدا يكسب الجمهور شوية شوية ، وبدا ياخد الاحترام اللي يحتقه ومع الوقت لما سار يدخل منافسات الكتابة الرسمية بدا ينتصر لدرجه انو سار بيفوز كل اسبوع تقريبا .

ومع انتشار سمعته اتعرض عليه انو تنذاع اغانيه فمحطحة"W H Y T " ، اكبر اذاعة راب فولاية ديترويت

وفنفس الفترة تقريبا ، حصلت اكبر مشكلة فحياة امينم ، اتوفى خاله روني.

رجع امينم لامه عشان يكتشف حقيقة اللي سار ، ولقا انو روني "انتحر " ، امينم اصيب بحالة انهيار وبدا يلوم نفسه ،كانت فكرته انو لو روني اتصل عليه قبل ما ينتحر كان قدر يقنعه انو ما يسوي كده

ومع استمرار لوم النفس دخل امينم فحالة من الاكتئاب ، ما احد قدر يطلعه منه لا امه ولا صاحبته " كيم" ولا اصحابه ، ولاول مرة من يوم ما كان عمرو 13 سنه بطل يكتب ، وكان كل اللي يسويه انو يشغل الاشرطة القديمة اللي سواها روني ويسمعها.

--------------------------------------------------------------------------------

5 - Hailie Jade

وفسنة 1985 جا الخبر اللي رجع الحياة جوة امينم ، "كيم " قالتله انها حامل

وفديسمبر 1985 اتولدت بنت امينم اللي سماها " هيلي جايد"

وبولادة البنت بدا امينم يفكر كيف حيصرف عليها وكيف حيعييشها حياة كريمة ومحا يسوي فيها زي ما سوا فيه ابوه

فكر انه يشتغل ، وعرف انه مافي شي يعرفله ويقدر يبدع فيه اكتر من الراب

فـ رجع للكتابة مرة تانية ،وللمرة التانية ما اخد منه غير فترة بسيطة وانتشر مرة تانية فديترويت وسار اسمه على كل لسان ، بعد فترة لاحظته شركة انتاج صغيرة اسمها " F T P productions " ، وعرضو عليه انهم ينتجو البومه الاول

--------------------------------------------------------------------------------

6 - Infinint

كانت اغاني امينم في ديك الفترة كلها دافعة للخير وتتكلم عن بنته وحبه ليها وحبه لعيلته

وبانتاج " اف تي بي " برودشكن نزل البوم امينم الاول " اينفيننت " سنه 1995 ، على غير المتوقع _ عالاقل من طرف امينم وشركه انتاجه " ، فشل الالبوم فشل ذريع
الناس ما اتقبلو اغاني امينم ، محطات الراديو ما كانت تذيع أغانيه ، مافي مجلات او اي نوع من الاعلام حاولو يتصلو بيه . باختصار شديد كان الالبوم فاشل تماما .
وبكده الشركة طردت امينم ، وزي ما يقولو المشاكل تحصل تباعا

فلس امينم وطردوه من شقته هوا ومرته وبنته

ومع كل المشاكل والضغط النفسي اللي كان بيتعرض ليه فديك الفترة ، وزي ما يقولو التاريخ يعيد نفسه ، حاول امينم الانتحار ، واخد جرعة زايدة من احد الادوية ، الا انو " كيم " انتبهتله وقدرت توديه المستشفى
وعالجوه الدكاترة ، وخرج من المستشفى عشان يكمل حياته

--------------------------------------------------------------------------------

7 - Slim Shady

وبخروج امينم من المستشفى رجع لكتابة الراب مرة تانية ، بس بطريقة تانية

رجعت لزاكرته كل الكراهيه اللي فنفسه وكل مشاكل الطفولة بالاضافة الى مشاكله الجديده

وفسنه 1997 اتولد " slim shady"

سليم شيدي هوا الشخصية الشريرة من امينم ، اعتمادا على اللي يقولو انو كل انسان مننا له شخصيتين ، شخصية طيبة وشخصية شريرة ( زي لما فافلام الكرتون يطلع للواحد شيطان فكتف وملاك في الكتف التاني)

سليم شيدي كانت شخصية كارهه للناس والمجتمع ، كارهه لطفولة امينم ، ما تركت شي غير وهاجمته ، طرقيتها في الهجوم ساخرة وتوصل احيانا للـ بلاهه ، سليم شيدي يتريق على اي شي وكل شي ما ساب حاجة فحالها ، وكان الشي دا ظاهر جدا فكتابات امينم تحت شخصية " سليم "

والغريب انو الجمهور اتقبل شخصية سليم شيدي بشكل مو معقول ، لدرجه انو امينم فاز بمسابقة " فري ستايلر اوف ذا يير " سنه 1997

وبعد فوزه بدي المسابقة بدا اسمه يظهر فمجلات الراب الكبيرة ، ودعوه انه يشارك فاكبر مسابقة " فري ستايل " فامريكا واللي كانت بتتنظلم فلوس انجلس

وصل امينم للجولة الاخيرة في المسابقة ، لكن وبعد سته جولات عنيفة مع منافسه ، انتها كل شي بالخسارة.

ولاكن كان المركز التاني كافي انو يشهر امينم لدرجه تكفي تهافت شركات الانتاج الصغيرة عليه ، وبالفعل اتفق مع وحده من الشركات على اصدار البومه التاني

--------------------------------------------------------------------------------

8 - The Slim Shady ep

" ذا سليم شيدي اي بي "
اصدر امينم الالبوم مع وحدة من شركات الانتاج الصغيرة ، مع تخوف شديد من اعادة تجربة " انفننت " ، لكن ولحسن حظ امينم الالبوم نجح نجاح كبير بالنسبة لمغني مغمور ومع شركة انتاج صغيرة
كان نجاح الالبوم مبهر لدرجه انو خلا امينم من اشهر الرابرز "المغمورين " او زي ما يسموهم فامريكا" اللي تحت الارض " " under ground"

وكان دا الشي يكفي انو يندعي عشان يغني مع فنانين حجمهم اكبر زي " كيد روك"

ومع استمرار النجاحات اللي مر بيها امينم ابتداءا من نزول البومه الجديد ، حس انه بدا اول خطوة فطريق النجومية ، وبدات تزداد عنده احلام النجاح والشهرة
لاكن ما كان على باله ولا فاحلى احلامه انو نسخه من الالبوم الجديد حتوصل لمكتب واحد من اشهر منتجي الراب في العالم ، ازا ما كان اشهرهم على الاطلاق " Dr.Dre "

--------------------------------------------------------------------------------

9 - Aftermath

يتبـــع...
__________________
الحياة ..
ما هي إلا مرحلة .. عليك اتقان الفوز فيها .. لتصل للنهاية السعيدة ..

موضوع: رد: EMNIEM الثلاثاء أغسطس 10, 2010 5:43 pm

يسسسسسسسسسسسسسسسسسسسسسسسسسسسسسسسسسسسسسسسسسسسسسسسسسلموووووووو

موضوع: رد: EMNIEM الثلاثاء أغسطس 10, 2010 11:40 pm

عهوده كتب:: يسسسسسسسسسسسسسسسسسسسسسسسسسسسسسسسسسسسسسسسسسسسسسسسسسلموووووووو

تسلم عيونك على المرور ثااااانكي اختي

ولو من واجبنا

موضوع: رد: EMNIEM الإثنين أغسطس 16, 2010 11:59 pm

يسسسسسسسسسسسسسسسسسسسسسسسلمو يااااعسسل

موضوع: رد: EMNIEM الأحد أكتوبر 03, 2010 8:12 am

مرررررررررررررررررسي

بس اذا عندك الفلم نبي الراااااااابط

موضوع: رد: EMNIEM الأحد أكتوبر 03, 2010 8:16 pm

يثلموووووووووو

موضوع: رد: EMNIEM الإثنين أكتوبر 25, 2010 1:48 pm

ثانكس يا حلو..~~

موضوع: رد: EMNIEM الإثنين أكتوبر 25, 2010 7:48 pm

ثانكس

موضوع: رد: EMNIEM الجمعة مارس 04, 2011 3:45 am

يعطيك ألف عاافية

موضوع: رد: EMNIEM السبت مارس 05, 2011 7:32 am

شكرا ع الموضوع الخطير وانا من معجبين امنينم

موضوع: رد: EMNIEM الإثنين مارس 07, 2011 7:26 am

مشكووووووور
على الجهد الرااايع
لك الشكر

موضوع: رد: EMNIEM الجمعة مايو 27, 2011 4:01 am

يسلمو انا اموت في امنم وربي احبه هوا و كلوشتي