قصه فتاه في جده مع السيول حقيقيه شوفوهااا

قصة البنت
والله يابنات عمري فحياتي ما اتخيلت إني أنحط في موقف زي كدا
ربي لطف وسلم بس ما نقول غير الحمد لله على كل حال
تخيلوا إني خرجت من بيتي الساعه التاسعه صباحا وما دخلت البيت إلا اليوم الخميس الساعه 12 الظهر
وربي جهاد إللي كنا فيه
شحططه بكل ما تعنيه الكلمة من معنى
تخيلوا فعز المطر خلونا ندخل ونختبر بالغصب ولا رضيوا يأجلوا الإختبار
سألتكم بالله في جو زي كدا كيف ممكن الواحد يحل في الإختبار
الإسعاف والمطافي والشرطه كلهم يدوروا حوليننا بين المباني
تخيلوا موقفي وأنا ماشيه من مبنى لمبنى تحت المطر عشان اجيب عبايتي من اللوكر الاقي الدنيا صارت خليطي حريم برجال
فتحوا كل البوابات وبوابات الطوارئ ودخلت الباصات والسيارات الخاصه فوسط الجامعه ويلقطوا البنات من المباني باصك مو باصك سيارتك مو سيارتك ما يهمك تدخلي وخلاص
انا ركبت في باص من باصات الجامعة ونقلونا على سكن الطالبات على أساس إنو أأمن من الجامعة بس ما ضربت كيابل الكهربا فيها ولا كانت السقوف تخرخر علينا
ابدا ولا شي من دا
قال امن قال

وربي يا بنات أنا كنت أمشي في الجامعه ابغى اول بوابه غربيه واحدوالمويه مغطيتني لين وسطي
جلست في سكن الطالبات لين الساعه خمسه العصر على ما قدر يوصللي عمو وخرجنا من الجامعة طول الطريق والسيارة تدخن
عدينا على النفق اللي عند محمود سعيد ولا أحكيلكم عاللي شفته ............!!!!
قالي ايش عمي حب يختصر الطريق ويمشي من الشوارع الفرعيه بين البيوت عشان يبعد من المويه لأن سيارتنا صغيرة
و أول ما دخلنا عند الثانويه الأولى خلف اسكان الشرفية وقفت السيارة منسوب الموية في الشوارع الداخليه كان اعلى بكتيييير من الشارع العام وصارت المويه تدخل جوا السيارة
تخيلوا المويه دخلت في السيارة ووصلت لين الدركسون خرجنا من السيارة وسبناها وصرنا نمشي برجولنا والمويه واصله لين نص الفخد وصلنا لشارع كانت المويه تجري فيه بقووة
أقول لعمي والله ما حنقدر نمشي فيه يقوللي إنتي بس امسكي فيا ولا عليكي .....!!!!
وعاللي يسمعلك كلمه مره تانيه
وربي يا بنات شفت الموت بعيوني لا انا ولا هوا حتى قدرنا نوقف فمكاننا المويه صارت تجرفنا جرف احنا الإتنين
ربي لطف انو جمبن كان في ونش كبير تبع شركة الكهربافتحولنا الباب وعمو مسك فيد الباب
وصرنا كدا معلقين انا طايره وماسكه فيد عمو وعمو طاير وماسك فيد الباب والرجال يحاولوا يجرونا
اتعلق هوا فباب السيارة وجرني معاه هوا والسواق
ورمولي خشبة اتعلق فيها عشان يسحبوني
وربي بس ركبت الونش وانا احس اني صرت خرسه مو قادرة انطق بكلمة
وربي اللي شفته يفجع

وقفنا الونش عند شارع خالد بن الوليد ونزلنا هناك
صرنا نمشي لين وصلنا عند حدود شارع فلسطين ورجعونا كل مين يقوللك شارع فلسطين دماااااااار السيل فيه مرررة قوي مستحيل تقدري تمشي فيه ونرجع ديك المسافه كلها ونروح لين

شارع الستين ونفس الشي رجعونا صرنا نمشي كدا في الشوارع مو عارفين فين نروح
مالقينا نفسنا إلا قدام مستشفى بخش
دخلنا فيها على صلاة المغرب وجلسنا نحنا وأمة لا إله إلا الله معانا حالهم زي حالنا
جلسنا لين الساعة 12 في الليل وكل ماله الوضع يزيد سوء والوية يزيد منسوبها
خرجنا منها ونحنا نمشي جنب الأسوار عشان نقدر نمسك نفسنا بس
صاحب عمي كان ساكن في عمارة خلف المستشفى
رحنا عندهم وجلسنا هناك جزاهم الله خير والله ما قصروا معانا
اخر اللي خرج هوا وعمي راحوا يشوفوا السيارة وحاولوا فيها لين ما اشتغلت وجابوها
وبعد الصبح راحوا يدوروا على اسهل طريق ممكن نمشي فيه برجولنا في حال انو السيارة وقفت
والحمدد لله اتيسرت ووصلنا البيت بسلام
ودخلت وحضنت مامتي حبيبتي وحشتني مووووت
عمري فحياتي مانمت بعيد عنها
وب لين دحين عيني ماغمضت ولا قدرت انام
مع اني حموت من التعب بس كل ماغمضت عيني اتزكر المنظر واقوم مفجوعه
يارب اللهم لك الحمد كما ينبغي لجلال وجهك وعظيم سلطانه

اوه شي فضيع الله يصبركم

صدقيني كلنا ندعي لكم لاتخافي ازمه وتمر ان شالله

الله يصبركم ان شاء الله

يسلموووووووووووو ع الطرح.

الحمدلله ع السلامه
قدره الله قويه
انتي اتعودي من الشيطان وقولي الاذكار وان شاءالله تنامي من دون خوف

الله يصبركم يسلمو غلاتي

الله يكون في عونكـــم

الله لا يحرمنا منك
و لا من مشاركاتك
مع خالص ودي

» قصه حقيقيه
» قصه حقيقيه
» اتخيل الصووور حقيقيه ؟؟؟
» المهر ريال !!!! قصه حقيقيه
» قصة رعب حقيقيه... اغرب من الخيال ...!!!